Adduunyada dhammaanteed haddii adi laguu dhiibo, hadduu aqalku kaa guda xun yahay aayatiin ma laha e.

qoraalkani waxa fasixi kara qoraaga oo keliya
 

  

      

Qurux u muuji ninka ku qaba:

Tolow waa sidee? Dhallinyaranimadaadii dib ugu noqo. Marka aad baxayso ee aad dano kale qabsanayso, xaflad tegeyso, amma lagu casuumo sideed u ekaataa. Kaba kaalay oo marka aad kulmaysaan wiilka ay naftaadu u boholyowday sideed u ekaataa? Waxa hubaal ah in aad saacad ka hor xilliga ballanta muraayadda hor taagnaato, hadba dhan iska eegto, timaha kolba qaab ugu feedho. Waxa laga yaabaa in aad dharka kala beddesho oo aad is tidhaahdo labadani iskuma soo baxayaan, haddii aanad dhar haysanina waxad ka soo ergisan jirtay gabadha saaxiibadaa ah amma kula jaarka ah. Makiyaash, Xamuurad, Indha kuul, iyo wixii kale ee la is marin jiray ayaad ku mashquulaysaa muddo dheer. Waxa keliya oo aad sidaasi u yeelaysaana waa in aad ninkani hantido oo aanu cid kale u hanqal taagin, kama dhoohanid haweenka caynkaaga oo kale ah, ee qaabkaaga u labista ee kula socda, hadba ilqoodha ayaad ka eegaysaa saaxiibadaada kula socota.

Taasi waa sheeko hore, haatani iyo dhab weeyaan, waxad hantiday ninkaagii, sidee ayaad u eeg tahay. qaabkee ayaad tahay, sideed u qaabishaa maanta oo aad tahay xiddigtii gurigiisa, ooridiisa dhabta ah ee haddii aad dariiq wada martaan aanad ka fikiraynin in lagu fadeexadeeyo. Waxad tahay basari!!!!!!! oooohhhhh, waan ka xumahay, kuma caayayo, kulamana kaftamayo ee runta ayaa kuu sheegayaa. Waxad ku qaabishaa diriac shiid ah oo jeex jeexan, dhidid basali ka soo butaacayso, qoosh iyo faardaacii ilmuhu ku masaxan yihiin. Cunto ayaad u soo dhigaysaa, ka rabtaa in uu kuu mahadiyo, ku soo eego oo uu inta uu soo kaco ku dhunkado "xabiibi iyo qalbii" cod debecsan oo naxariisi ku dheehan tahay kugu yidhaahdo. Miyaad ka filaysaa intaasi adiga oo caynkaa u eeg? Jawaabtu waa maya.Su'aal baan ku weydiinayaa. Ma waxad ka werwersan tahay in aanu ninkaagu ku jeclayn maadama uu kuu qaabili waayey sidii uu kuu qaabili jiray dhallinyarnimadii, xilligii haasaawaha.? Inad werwerto looma baahna. dib u noqo oo sideed ahayd dhallinyaronimadii.

Guriga caynkaasi ayaad ku tahay, dibada marka aad u baxayso ee adiga oo xaas leh aad xaflad tegeyso sidee ayaad u qaab ekaataa, sow alaabihii ma qaadatid. Yaanay xafladaha iyo bannaanku ninkaaga kaala qiimo badnaanin, ha is tusin dadka kale si loo yidhaahdo, "heblaayo sidii loo guursadayba way da' yaraatay" ninkaaguna leeyahay "maxaa quruxdeedii ku dhacay". ee uu werwerayo. Labbisku meel buu ku qurux badan yahay, indhaha iyo noloshuna qurux bay u baahan yihiin, quruxdiina waa adiga gabadh yahay soomaaliyeed.

Haddii aad ninkaaga oo shaqo tegeya is qurxiso, cadar iyo uunsi iska buuxiso, sidii dhallinyarnimadaadii noqoto. indhihiisu waxay eegayaan adiga, maankiisuna adiga ayuu kugu maqnaanayaa, hammigiisuna xagaaga ayuu u jeesanayaa. quruxdaada ayuu ammaanayaa. Huga iyo labbisku waxay ka qayb qaataan raaxada ninka, cadarkuna dareenkiisa ayuu kiciyaa. Dhowaanshahuna deganaan iyo kalsooni ayuu keenaa. Gabadh carbeed oo xilligii jaahiliyadda inanteeda oo la soo doonay la dardaarmaysay ayaa tidhi ' nadaafadda badso' . Ilaan soddoh ah ayey inanteedii u cabasho timiday oo ku tidhi "hooyo ninkaygii iimaba hammoodo" waxay ugu jawaabtay eeg, talada ay siisay dhuux, waxay ku tidhi oo keliya "dirac xidho oo xagga iftiinka ka mar" sidii ayey yeeshay, maxaa dhacay, waad dareemi kartaa. Xaaraan maaha in aad dhar dhejis ah amma gaagaaban, amma kuwa gudahaba dheh oo xidhato xilliga aad adiga iyo ninkaagu isku kelliyeysataad. Wax kuu diidayaa ma jirto, xarakaad quruxeed samee, muuji halka jidhkaaga ugu aragti fiican ee aad markii aad dhallinyarad ahayd muujin jirtay sir ayaa ku jirta e.

Jidhkaaga qurux ku ilaali: riix halkani

 

SIRTA NOLOSHA:


Hilaygiyo waxaan saabka
U gilgiley Samaw haanta
Subag inay ku dhiiqdaaye
Saasay ku badisaaye
Sannad weliba xeeshiiye
Kol hadday silloonaato
Samaheedu waa dhiige
Sumuc talada loo dhiibye
Sida sida sidaas weeye
Si la yeeli jirey weeye

Marka xiga Samaw heedhe
Talo sibiq dhaqaaqeeda
Soof-daran habawgeeda
Sal-fudaydka hooggiisa
Bal sallaankan fuul laalan
Iyo sagabtan heensaysan
Dhulka saas u jeedaali
Sidan iyo sidaas fiiri
Sidan iyo gadaal dheeho

Raqda solan lafaa soogan
Bal su'aal u celi meydkan
Sababtuu u go'ay raadi
Bal dhegeyso saylaanka
Iyo salowga beer-qaadka
Iyo sebiga yeedhiisa
Waxaad aragtay oo saasa
Waxaad maqashayoo saasa
Maxaad odhan lahayd Suudi?

IDHO BADAN

God abeeso ninkii
Illinkeeda degow
Taladaadu iyaa
Ma allow sahal baa?

Arraweelo markay
Laba eefka lahayd
Igadh geela haddii
Nin aroorsan lahaa
Amarkeedu hor yiil
Odhan mayno kolkey
Awooddii rag dhintay
Sii agaasimatoo
Aakhiruu ku maqnaa
Ugaaskay dhaxashoo
Arrimii dhacay qaar
Utintooda haddeer
Lama oogi karoo
Abba looma hayoo
Sheekadaaba iskeed
Ma amaahan karee
Halka aahdu ku taal
Waa la sii axadhaa
Godob oofa ruqdaa
Aabudhkeeda riddoo
Alolkay jaratoo
Ibahay furatoo
Aslimayno dhaliil
Odjamleedi durkee
Immankaynu hubnaa
Waxa eegga jirree
Awgayow taladii
Ifka maw rogannaa

HOOYO:

Hooyoy la'aantaa
Aduunyadu hubaashii
Habeen kama baxdeenoo
Iftin lama heleenoo
Dadku uma hayaameen
Xiddig hawd ka lulatoo
Sida haad ma fuuleen
Dayax heego joogoo
Hubka laguma tureen
Hawo laguma gaadheen
Cirka hirar ka muuqdoo
Hooyoy addoomuhu
Halkay maanta joogaan
Adigow horseedoo
Intaad hanad xambaartee
Haaneedka siisee
Horaaddada jaqsiisee
Habtay baan xisaab iyo
Tiro lagu heleynoo.

 
noloshaqoyska 37994 visitors (96109 hits) bogani
=> Do you also want a homepage for free? Then click here! <=
Garashiyo sugnaan yeelo, falka sami ha kuu raaco, mana jiro sed kaa baaqday.